Act 4 | MHL | STEP | Aria Pita Yon ikos tempel koor kemena-pa opora wia wafuromami maemik, “Yeesus umep ikok iikirak. Ne emeria mua pun umep ikoka kiiriw iikirikuan.” Naap maiwkin wi pris papako ne tempel koora ami mua maneka ne wi Sadusi teeria wi unow onaiya kema bagiwirap ekapep wia opamik.

Acts 4

1 Aria Pita Yon ikos tempel koor kemena-pa opora wia wafuromami maemik, “Yeesus umep ikok iikirak. Ne emeria mua pun umep ikoka kiiriw iikirikuan.” Naap maiwkin wi pris papako ne tempel koora ami mua maneka ne wi Sadusi teeria wi unow onaiya kema bagiwirap ekapep wia opamik. 3 Nain urer akeniya koora-pa wia wuamik, uurika opora-pa wia wuiyen naemik. 4 Ne emeria mua unowa opora wia miimamik nain Yeesus opora wiar opamik. Wi teeria nain ne wi mua iiriw opora wiar opap ikemik nain onaiya wia tuunamik nain mua tausen ikur (5,000) naap.

5 Aria epa wiimeya uurik ona wi owow woos mua, wi mua iperowa, wi sira amis mua ne wi pris woos mua Yerusalem-pa wiam fiirimemik. 6 Pris woos mua Aanas, ne pris papako, Kaiafas, Yon ne Alesanda naap wiam fiirimep mua merena saliwamik nain Pita Yon ikos gone-pa wia iimarowap wia nokaremi maemik. “Ni mua fain kamenap saliwaman? Ni naarew kekanowa-pa ne unuma unufami sira nain onaman?”

8 Ne Mua Maneka Ewar-ke Pita kekanoweya wia maakek, “Ni Isrel woos mua ne mua iperowa, ni aakisa i mua meren samora fain kemalep asipamkun sariarek nain yia nokariman-i? Ne ni mua fain kamenap asipamik nain amisaru naiwkin eliw nia maakiyen. Ne wi Isrel emeria mua unowa pun naap amisaruk. 10 Mua urufiman fain Yeesus unuma-pa sariarek. Yeesus Krais eena nis-ke nomokow moke-pa wuiwkin umeya Mua Maneka-ke iikirowak nain-ke. 11 Ne Mua Maneka opora pun iiriw o maem-ikemik. Feenap,

‘Poka ni koora kuow mua-ke miatinep iirareman nain-ke aakisa umua poka koonowap-pueya ikua.’
(Someka 118.22)

12 Mua Maneka yia aawowa nain i Yeesus unuma muutiw unufamkun yia aawinon. Era oko-ko me ikua. Moram Mua Maneka-ke mua oko-ko me yia pepekimomak.” Pita-ke naap maek. 13 Wi Yon ikos me karanemik, kekanep naap aakunemik. Naeya wi woos mua soranep maemik, “Wiam erup fain suule maneka-ko me ikiwemik. Wi mua oram-ke, nain moram opora naap aakunimik.” Naap maemi wia pupep wia ilenamik, wi iiriw Yeesus ookam-miemik nain-ke, naapeya opora kakeniw maemik. 14 Ne mua sariarek nain nan Pita Yon ikos wiamiya iimarep ikaeya wi aakunowa me pepek, opora marewaremik. 15 Neemi Yon Pita ikos ni naap oro-oreka wia naakemik. Wi oraiwkin wiena wiisow ikok aakunemi maemik, 16 “Wiam erup fain sira kamenap wia oniyen noma? Wi maa miililina onamik nain wi Yerusalem emeria mua unowa iiriw amisaremik. Ne i nain wiar sailowa me pepek. 17 Aria opora fain manekareya emeria mua unowa me miimuk. Naapeya wiam erup fain wia keker opowawami wia maakemkun Yeesus opora ne unuma kiiriw me wia maakuk.”

18 Aria wiam erup kiiriw wia farep ekapiwkin wia maakemik, “Yeesus uuwowa nain kiiriw me wia maakem-miaweka.” 19 Ne wia, Pita Yon ikos opora wia kiripomami maemik, “Ni kema suuweka, kaanin-ke eliwa, Mua Maneka opora yia maakiya nain ookiyen-i e ni yia maakeman nain niar ookiyen? I yiam erup opora me kokotiyen, moram i maa yiena urufamik ne miimamik nain maiyen.” Naap maemik. 21 Mua meren samora eena saliwamik nain mokoma ten erepam aawok. O sariarek nain emeria mua unowa nain urufap Mua Maneka unuma fakeram-ikemik. Naapeya wi wiam erup wia samorowa nain oko wi emeria mua yia maikuan naep me wia samoramik. Sira nain kiiriw me oneka wia naakep-puap wia piipuiwkin ikiwemik.

23 Ne wiam erup oromi wiena teeria wiar ikiwemik. Ikiwep wi pris woos mua ne woos mua papako opora kamenap wia maakemik nain wia nanaromamik. 24 Ne wi teeria nain naap miimap unow onaiya Mua Maneka unuma fakerami maemik, “Oo Mua Maneka, no kekanowa onaiya ikon. Nos-ke aapereka, miiwa, ifera ne eka ne maa muutitik onaiya onan! 25 Iiriw nena Ewar-ke yiena nembesir Dewit, eena nena uuwow mua nain kema iweya naap maek,

‘Moram wi owow oko oko teeria-ke kekanep urupep yiamiya iraku naep onimik? Ne moram wi emeria mua opora maken marewa nain yiamiya iraku naep onimik?
26 Wi owow-owowa saria wiam fiirimep Mua Maneka ne ona Krais pepekimok nain wiamiya iraku naep maa sirarep-puamik.’
(Someka 2.1-2)

27 Maken akena, Erot, Pontius Pailat ne wi owow-owowa mua ne wi Isrel mua owow maneka-pa fan wiam fiirimep Yeesus ifakimemik, nena uuwow mua eliwa eena nena iiriwiw pepekimon nain. 28 Ne wi naap onamik nain no opora maep-puan nain wi me nefar amisaremik. Naeya o ifakimemi nena opora iiriw maen nain makena arowamik. 29 Aria Mua Maneka, aakisa wi sira yia onamik nain yia kema suuwami i nena uuwow mua yia kekanowe. Ne i kekanep nena opora emeria mua wia maakem-miawiyen. 30 Ne i nena uuwow mua eliwa Yeesus unuma-pa napum emeria mua wia saliwami maa miililina oniyen.” 31 Wi Mua Maneka farem-ikaiwkin Ewar Eliwa-ke wiar oromi koora eena wiam aawep ikemik nan maa ofofona saarik wia ofofak. Naeya wi kekanowa aawep oromi Mua Maneka opora wia maakem-miemik.

Yeesus opora wiar opamik nain maa unowa wiam asipamik

32 Aria wi Yeesus opora wiar opam-ikemik nain kema kuisow ikemik. Wi miikapura wiam onowa marew, wiam asipam-ikemik. Mua kuisow naap-ko me maem-ikua, maa nain yena-ke, weetak. Maa unowa sererkap kuisow kuisow aawem-ikemik. 33 Ne wi aposel Mua Maneka kekanowa onaiya ikok yiena Maneka Yeesus umep iikirak nain wia maakem-miemik. Naeya Mua Maneka wia asipeya wi eliw ikemik. 34 Naapeya wi nain mua kuisow maa-ko me iiwarem-ikemik. Moram iir nain wi mua miiwa ne koora onaiya ikemik nain sesekam-ikemik. Sesekap maamuma aawep wi aposel wapena-pa wiar wuam-ikemik. Ne wis-ke maamuma nain sererkap wi mua oram ikemik nain wia asipam-ikemik. 36 Ne aria Liwai kerekera mua-ko, ona owowa Saiprus. Mua nain unuma Yosep ne wi aposel-ke unuma oko Banabas naemik. (Unuma nain kemena feenap, “Kema wia iikirowow mua”.) 37 Os pun ona miiw ara oko sesekap maamuma aawep pikiwep wi aposel wapena-pa wiar wuak.